Mikel Obi: Nigerian player announce retirement from professional football – BBC

  • September 28, 2022

Wia dis foto come from, Mikel Obi
Former Super Eagles Captain John Mikel Obi don retire from playing football at di age of 35.
Di 2013 Africa Cup of Nations winner wit di Super Eagles, announce im retirement ontop im Instagram page today, 27 September, 2022.
Dis one mean say im don comot hand from playing football as career kpata kpata, no more playing of club football again.
Di former Chelsea player write emotional message wia e tok say evri good tin for life get di day wey e go end.
"E get one saying all good things must come to an end”, and for my professional football career, dat day na today. ''I look back at di past 20 years of my career, and I must tok say I dey very satisfied wit all di tins wey I dey able to achieve and more importantly di human wey e don help shape.
Di former Chelsea player add say all di tins wey im don achieve for football , no for dey possible witout im family pipo wey stand gidigba dey support am. ''All dis tins for no dey possible witout di support of my family, managers, clubs, coaches, teammates wey no dey shake, and most importantly my ever-loyal fans.
''Una support me through my highs and lows, even on days wey I not live up to una expectations. I say a big thank you.
Mikel Obi for im message still advice pipo wey im football don ginger to chase different dreams for dia lives, e encourage dem make dem no get up. ''I go also like to encourage evribodi wey I fit don ginger one way or di oda for my dey my career to neva give up on dia dreams, for evri time you think about quitting, remind yourself why you start. ''Dis no be goodbye, na di start of anoda journey, anoda chapter of my life. I look forward to weti di future get and I hope una go waka wit me. Thank you". E write
Wia dis foto come from, Mikel Obi
Some former and current Super Eagles player don enta Mikel Obi page as dem dey react to di news.
Odion Ighalo say "Congratulations skippo and goodluck'
Ogenyi Onazi also say" Ahhhh skippo , I miss you sha LEGEND"
Former Cote d'Ivoire and Chelsea play Solomon Kalou " OGaaaaaaaaa I dey miss you Baba Thank You for di wonderful journey, I fancy well well dat first photo". E tok.
Former Super Eagles player and coach Austin Eguaveon also write for Twitter:
Di Nigeria Football Federation (NFF) don follow tell Mikel Obi 'thank you' as di fooball governing bodi for Nigeria wish am well.
For di official twitter handle NFF tweet say "Thank you for di memories and goodluck
UEFA Champions League also remember di role wey Mikel Obi play during di 2012 Champions League season wey Chelsea win.
Di European football governing bodi also share video of Mikel Obi for dat match.
Wia dis foto come from, Getty Images
Dem born Mikel Obi for April 22, 1987 , Jos, Plateau State, north central Nigeria.
E be both Nigeria and United Kingdom citizen.E dey play Defensive midfield, central and attacking midfield.
Mikel Obi start im professional football career from Nigeria wit Plateau United for October, 2004 e join Lyn FK for Norway on free transfer.
Na for 2006 e comot from Lyn Fk enta Chelsea wia e spend most of him playing days. During im time for Stamford bridge, Mikel na one of di African players wey dey play well well for di club.
Chelsea FC for dia official page tok say pMikel Obi play key role for dem wen dem win di 2012 Champions League.
"Afta im give di Blues over a decade of service afta we sign am as a fresh-faced 19 year-old, di midfielder lift evri major honour, wey include two Premier League titles, di Champions League and di Europa League, among odas"
Chelsea say Mikel get 372 appearances for Chelsea shirt.
Mikel also play for some clubs for England like Middlesbrough and Stoke City.E also play for Chinese side Tianjin Teda, Trabzanspor for Turkey.
Na Kuwait FC e dey before im retire.
Mikel Obi win
2 Premier League
3 FA Cups
1 Football League Cup
1 Community Shield
1 UEFA Champions League
1 Europa League
1 Turkish League
© 2022 BBC. De external site no concern BBC. De way wey we de take go external link.